“Onalar – butun bashariyatning tarbiyachilaridir”

Abdurauf Fitrat

Barchamiz orziqib kutgan mana shu go‘zal bahor faslida, aziz ayollarimizning 8 mart – Xalqaro xotin-qizlar bayrami arafasida siz, azizlar bilan ko‘rishib to‘rganimdan mamnunman!

Ko‘ngillarimiz yorug‘ tuyg‘ularga to‘lib borayotgan mana shu shukuhli ayyomda siz azizlarni, sizlar orqali butun oilangiz dilbarlarini 8 mart bayrami bilan o‘zim va jamoamiz erkaklari nomidan muborakbod etishga ruxsat bergaysizlar.

Bugun har birimiz cheksiz minnatdorlik hissi bilan Yaratganning buyuk mo‘jizasi bo‘lgan ayol zotiga – mehribon onalarimiz, qadrli opa-singillarimiz, lobar qizlarimiz sha’niga yeng go‘zal so‘zlarni aytamiz. Biz sizlarni avvalo fidoyilik timsoli deb bilamiz. Mehridaryo qalbingiz, aql-zakovatingiz, sevgi va sadoqatingiz qarshisida ta’zim qilamiz.

Shu fursatdan foydalanib, davlatimiz rahbari tomonidan olib borilayotgan oqilona davlat siyosati va keng qamrovli islohotlar negizida ayollar masalasi doimiy diqqat markazida ekanini ta’kidlamoqchiman. 

Hozirda xotin - qizlarimiz mamlakatimizning siyosiy - ijtimoiy hayotida, huquqiy demokratik davlat va fuqarolik jamiyatini barpo etish jarayonlarida ham faol ishtirok etmoqda. Bugungi kunda respublikada ayollarimizning ulushi ta’lim sohasida – 74 foizni tashkil etmoqda. Bundan tashqari, yangi tartibga muvofiq, davlatimiz tomonidan magistraturada o‘qiyotgan 10 mingdan ortiq talaba-qizlarning kontrakt pullari to‘lab berildi, 65 mingdan ko‘proq talaba xotin-qizlarga foizsiz ta’lim krediti ajratildi. Ehtiyojmand oilalarda yashayotgan qariyb 2 ming nafar qizlar, shuningdek, mutaxassisligi bo‘yicha besh yillik mehnat stajiga ega bo‘lgan

500 nafardan ortiq xotin-qizlar oliygohlarga alohida kvota asosida o‘qishga qabul qilindi. Bu ham ayollar masalasi davlatimizning doimiy diqqat markazida ekani yana bir bor tasdiqlaydi.

Hurmatli opa-singillar!

Yurtimizda hukm surayotgan o‘zaro hurmat, mehr-oqibat va ahillikni yanada mustahkamlash, yoshlarning ongini chetdan yopirilib kelayotgan turli xavf-xatarlar, “ommaviy madaniyat” xurujlaridan saqlash, oilalarda, mahallalarda olib borayotgan tarbiyaviy ishlarimizning samarasini oshirishni bugun tobora keskinlashib, murakkablashib borayotgan hayotning o‘zi talab etmoqda.

Haqiqatan ham, siz, azizlarning yurtimizda tinchlik-osoyishtalikni saqlash, oilalarni mustahkamlash, jamiyatimizda mehr-oqibat muhitini kuchaytirishdagi o‘rningiz va ta’siringizni, chidam va sabr-bardosh, oqilalik va shukronalik kabi fazilatlaringizni hech narsa bilan qiyoslab, baholab bo‘lmaydi. Hech ikkilanmasdan aytmoqchiman: o‘zining go‘zalligi va fidoyiligi, mehnatkashligi va bag‘rikengligi bilan bizning yurtimiz ayollariga teng keladigan ayollar dunyoda topilmaydi. Ayniqsa, institutimizning dilbar va jonkuyar ayollari millatimiz durdonalaridandir.

Xususan, institutimizda 210 dan ortiq ayol xodimalar faoliyat olib borayotgan bo‘lsa, shulardan 90 tasi o‘qituvchi va murabbiylardir. Quvonarlisi shundaki, ularning 35 nafari (39 foiz) ilmiy daraja va unvonga ega xotin-qizlar, olima ayollar sirasiga kiradi.

Bugun shiddat bilan o‘zgarib borayotgan globallashuv va Yangi O‘zbekistonning taraqqiyot strategiyasi zamonida sizlarning hech kimdan kam bo‘lmasdan, hayotimizning hal qiluvchi ustuvor yo‘nalishlarida, zamon talablari bilan har tomonlama uyg‘un va hamohang bo‘lib, ulkan yutuqlarga erishayotganingizni biz yaxshi bilamiz va yuksak qadrlaymiz.

Sizlarni, sizlarning timsolingizda barcha onaxonlarimiz, opa-singillarimiz, dilbar ayollarimizni ushbu bayram bilan chin qalbimdan muborakbod etib, o‘zimning chuqur hurmat va ehtiromimni bildirishga ijozat bergaysiz. Millatimizda hamisha ayollarni e’zozlab yashagan, xotin-qizlarga yuksak ehtirom ko‘rsatib yashash elimizga xos azaliy qadriyatga aylangan.

Aziz va qadrli opa-singillar!

So‘zimning oxirida barchangizni Xalqaro xotin-qizlar bayrami bilan yana bir bor chin qalbimdan tabriklayman.

Mening tilagim, mening maqsadim bitta – oilangiz, farzandlaringiz, el-yurtimiz baxtiga hamisha sog‘-omon bo‘linglar! Barchangizga oilaviy xotirjamlik, xonadonlaringizga tinchlik, fayzu baraka tilayman.

Doimo jamoamiz, shogirdlar, xalqimiz, Vatanimizning yuksak mehri va ardog‘ida bo‘lish hammangizga nasib etsin! Zero, ayolini  qadrlagan el ziyoli, ulug‘lagan millat jannatidir. 

Yana bir bor bayramingiz muborak bo‘lsin!