Korrupsiyaga qarshi kurashish "Komplaens nazorat" tizimini boshqarish bo'limi

Samarqand iqtisodiyot va servis institutining Korruptsiyaga qarshi kurashish “Komplaens nazorat” tizimini boshqarish boʼlimi toʼgʼrisidagi NIZOMI

I. Umumiy qoidalar

1. Mazkur Nizom Korruptsiyaga qarshi kurashish “Komplaens nazorat” tizimini boshqarish boʼlimining (keyingi oʼrinlarda - boʼlim) maqomi, asosiy vazifalari, funktsiyalari, huquqlari, javobgarligi, faoliyatini tashkil etish, xodimlarning funktsional vazifalari hamda javobgarligini belgilaydi.

2. Boʼlim institutning tarkibiy boʼlinmasi hisoblanadi.

3. Boʼlimning faoliyati institutda “Komplaens nazorat” tizimini boshqarish, shuningdek korruptsiyaga qarshi kurashish faoliyatini olib borishga yoʼnaltirilgan boʼlib, oʼz vakolatlari doirasida bevosita institut rektoriga boʼysunadi hamda Oliy va oʼrta maxsus taʼlim vazirligi (keyingi oʼrinlarda - vazirlik)ning Komplaens nazorat va korruptsiyaga qarshi kurashish boʼlimiga hisobot beradi.

4. Boʼlim oʼz faoliyatida Oʼzbekiston Respublikasi Konstitutsiyasiga va qonunlariga, Oʼzbekiston Respublikasi Oliy Majlisining qarorlariga, Oʼzbekiston Respublikasi Prezidentining farmonlari, qarorlari va farmoyishlariga, Oʼzbekiston Respublikasi Vazirlar Mahkamasining qarorlari va farmoyishlariga, vazirlik buyruqlariga va Hayʼati qarorlariga, mazkur Nizom, institutning ichki buyruqlari, shuningdek boshqa qonun hujjatlariga amal qiladi.

5. Boʼlim oʼz faoliyatini institutning boshqa boʼlimlari bilan oʼzaro hamkorlikda amalga oshiradi.

II. Boʼlimning vazifalari va funktsiyalari

6. Quyidagilar boʼlimning asosiy vazifalari hisoblanadi:

institutda korruptsiyaga oid huquqbuzarliklarni profilaktika qilish va ularga qarshi kurashish;

oliy taʼlim tizimida “Korruptsiyasiz soha” loyihasini institut miqyosida amalga oshirishga qaratilgan chora-tadbirlar ijrosini taʼminlash;

institutda korruptsiyaga qarshi kurash “Komplaens nazorat” tizimini joriy etish va uni amalga oshirish;

institutda korruptsiyaga oid havf-xatarlar yuqori boʼlgan yoʼnalishlar hamda korruptsiyaga doir huquqbuzarliklar sodir etilishining sabab va shart-sharoitlarini aniqlash;

institutda korruptsiya qoʼrinishlari namoyon boʼlishiga olib keladigan tizimli muammolar va ularni bartaraf etish boʼyicha tegishli takliflarni kiritgan holda axborot berib borish;

institutda korruptsiyaga oid huquqbuzarliklarning sabab va shart-sharoitlarini bartaraf etish hamda korruptsiyaga qarshi kurashish choralarining samaradorligini oshirishga qaratilgan dasturlar ijrosini taʼminlash;

institutda korruptsiyaga qarshi kurashishga yoʼnaltirilgan jamoatchilik nazoratini muvofiqlashtirib borish, shuningdek zamonaviy usullar va axborot-kommunikatsiya texnologiyalari asosida korruptsiyaga qarshi monitoring olib borish;

korruptsiyaga qarshi kurashish va jamoat nazorati sohasida umum eʼtirof etilgan xalqaro standartlar va xorijning ijobiy tajribasini oʼrganish hamda ilgʼor jihatlarni tatbiq etish boʼyicha takliflar ishlab chiqish;

institutda korruptsiyaning holati, tendentsiyalari va sabablari hamda korruptsiyaga qarshi choralar koʼrishning samaradorligi yuzasidan sotsiologik, ilmiy va boshqa tadqiqotlarni tashkil etish va takliflar ishlab chiqish;

institut akademik litseyn hamda texgikumlarining korruptsiyaga qarshi kurashish yoʼnalishidagi faoliyatini muvofiqlashtirish.

7. Boʼlim oʼziga yuklangan vazifalarni bajarish uchun quyidagi funktsiyalarni amalga oshiradi:

institutda korruptsiyaga qarshi kurashishga oid qonunlar va qonunosti hujjatlar, shuningdek, Vazirlik Hayʼati qarorlari va buyruqlariga rioya etilishi ustidan nazorat olib boradi;

korruptsiyaga oid huquqbuzarliklarning oldini olishga qaratilgan chora-tadbirlar va ish rejalarini ishlab chiqadi, ularning toʼliq, sifatli va oʼz vaqtida ijro etilishini taʼminlaydi, belgilangan chora-tadbirlarning amalga oshirilishi ahvolini oʼrganadi, natijalari boʼyicha maʼlumotlar tayyorlaydi;

institutda “Korruptsiyasiz soha” loyihasini amalga oshiradi;

institutda korruptsiyaga qarshi kurashish boʼyicha chora-tadbirlarni amalga oshirishga qaratilgan ichki hujjatlar loyihalarini ishlab chiqadi va tasdiqlash uchun rektorga kiritadi;

institutning ichki hujjatlarida aniqlangan korruptsiyaviy normalarni bartaraf qilish boʼyicha takliflar ishlab chiqadi;

institutda korruptsiyaviy havf-xatarlarni baholaydi va ularni kamaytirish yuzasidan chora-tadbirlar rejalarini ishlab chiqadi;

institutning professor-oʼqituvchilari, boshqaruv, texnik, xizmat koʼrsatuvchi va oʼquv-yordamchi xodimlarining xatti-harakatlaridagi korruptsiyaviy havf-xatarlar va huquqbuzarliklar xaqida kelib tushadigan murojaatlar va anonim xabarlarni koʼrib chiqadi hamda oʼrnatilgan tartibda choralar koʼradi;

institutda korruptsiya faktlariga doir xizmat tekshiruvlarining reestrini yuritib boradi;

davlat xaridlarini amalga oshirishda manfaatlar toʼqnashuvini tahlil qilishda va kontragentlarning ishonchliligini tekshirishda ishtirok etadi;

institut xodimlari oʼrtasida manfaatlar toʼqnashuvi monitoringini yuritadi va tegishli takliflar kiritadi;

institutning professor-oʼqituvchilari, boshqaruv, texnik, xizmat koʼrsatuvchi, oʼquv-yordamchi xodimlari oʼrtasida muntazam ravishda profilaktik suhbatlar tashkil etib boradi;

institut faoliyatida korruptsiyaviy holatlarni aniqlash maqsadida professor-oʼqituvchilar, boshqaruv, texnik, xizmat koʼrsatuvchi, oʼquv-yordamchi xodimlar, talabalar (magistrantlar, doktorantlar, mustaqil izlanuvchilar) va aholi oʼrtasida soʼrovlar oʼtkazadi;

soʼrovlar, ijtimoiy va boshqa tadqiqotlar asosida korruptsiyaga qarshi kurashish targʼiboti boʼyicha chora-tadbirlar natijalari va taʼsirini muntazam ravishda baholab boradi hamda keyingi chora-tadbirlarni belgilashda baholash natijalaridan foydalanadi;

professor-oʼqituvchilar, talaba-yoshlar oʼrtasida korruptsiyaga qarshi kurashishga qaratilgan konferentsiyalar, uchrashuvlar, seminarlar, tanlovlar tashkil etadi;

institutda korruptsiyaga qarshi kurashish sohasida kabul kilinayotgan chora-tadbirlarning samaradorligini baholaydi;

institutda korruptsiyaga oid huquqbuzarliklar sodir etilishining shart-sharoitlari va sabablarini oʼrganadi, shuningdek ularni bartaraf etish boʼyicha takliflarni ishlab chiqadi;

institutning rasmiy veb-saytida “Korruptsiyaga qarshi kurashish” boʼlimidagi maʼlumotlarni muntazam ravishda yangilab borilishini taʼminlaydi;

xar chorakda va zaruratga koʼra korruptsiyaga qarshi kurashish boʼyicha amalga oshirilgan ishlar hamda institutdagi korruptsiyaviy vaziyat xaqida rektorga hamda oliy va oʼrta maxsus taʼlim vazirligining Komplaens nazorat va korruptsiyaga qarshi kurashish boʼlimiga hisobot beradi;

oliy va oʼrta maxsus taʼlim vazirligining Komplaens nazorat va korruptsiyaga qarshi kurashish boʼlimi hamda korruptsiyaga qarshi kurashish boʼyicha faoliyatni amalga oshiruvchi boshqa davlat organlari va tashkilotlari, ota-onalar bilan korruptsiyaga qarshi kurashish sohasida samarali hamkorlikni yoʼlga qoʼyadi;

institut huzuridagi akademik litseyning korruptsiyaga qarshi kurashish yoʼnalishidagi faoliyati ustidan nazorat oʼrnatadi;

institutda korruptsiyaga qarshi amalga oshirilgan ishlar monitoringini yuritadi, tahliliy materiallarni rahbariyatga hamda vazirlikka kiritib boradi.

III. Boʼlimning huquqlari va javobgarligi

8. Boʼlim oʼziga yuklangan vazifalar va funktsiyalarni amalga oshirish uchun quyidagi huquqlarga ega:

institut va uning huzuridagi akademik litseyga ishga kabul qilish, xodimlarni attestatsiyadan oʼtkazish, talaba (magistrant, doktorant, mustaqil izlanuvchi)larni imtihonlari (yakuniy, oraliq, malakaviy, yakuniy davlat attestatsiyasi, diplom himoyasi) jarayonlarini bevosita yoki videotranslyatsiya orqali kuzatib borish, mazkur jarayonlarda korruptsiyaviy havf-xatarlarni aniqlash;

institutning hamda uning huzuridagi akademik litseyning professor-oʼqituvchilari, boshqaruv, texnik, xizmat koʼrsatuvchi va oʼquv-yordamchi xodimlaridan ularning vakolatiga kiruvchi masalalar yuzasidan tahliliy materiallar, xulosalar, birlamchi va boshqa tasdiqlovchi hujjatlarni, statistik va boshqa maʼlumotlarni soʼrash, talab qilish va olish;

xizmat majburiyatlarini bajarish doirasida institut xodimlaridan zarur yordam soʼrash va olish, zarur hollarda ishchi guruhlar tashkil etish;

institutning Kengash majlisi yigʼilishlarida ishtirok etish;

institut rektoriga komplaens nazorat va korruptsiyaga qarshi kurashish masalalariga oid takliflar kiritish;

vakolati doirasida tekshiruvlar oʼtkazish, hujjatlarni talab qilish, institutning professor-oʼqituvchilari, boshqaruv, texnik, xizmat koʼrsatuvchi va oʼquv-yordamchi xodimlari, talabalar (magistrantlar, doktorantlar, mustaqil izlanuvchilar)dan yozma tushuntirishlar olish, jinoyat alomatlari aniqlangan hollarda tegishli huquqni muhofaza qiluvchi organlarga xabar berish;

oʼz faoliyati doirasida institutning tarkibiy boʼlinmalariga koʼrsatmalar va tavsiyalar berish;

Boʼlim qonun hujjatlariga muvofiq boshqa huquqlarga xam ega bulishi mumkin.

9. Boʼlim:

oʼziga yuklangan vazifalarning tegishli darajada va samarali bajarilishi;

oʼziga yuklangan funktsiyalarning bajarilishi hamda ijro intizomini taʼminlash talablarini bajarilishi;

institut rahbariyatiga axborot berish uchun materiallar va hujjatlarning belgilangan muddatlarda bajarilishini taʼminlanishi;

institutda komplaens nazorat va korruptsiyaga qarshi kurashish faoliyati boʼyicha amalga oshirilayotgan ishlar holati;

jismoniy va yuridik shaxslar murojaatlarining oʼz vaqtida koʼrib chiqilishi hamda qonunchilik hujjatlari asosida hal etilishi uchun javob beradi.

IV. Boʼlim tuzilmasi

10. Boʼlim tuzilmasi boʼlim boshligʼi va bosh mutaxassisni oʼz ichiga oladi.

11. Boʼlimga boshliq rahbarlik qiladi. Boʼlim faoliyati mustaqilligini taʼminlash maqsadida Boʼlim boshligʼi oʼz faoliyatida bevosita institut rektoriga va Boʼlim bosh mutaxassisi Boʼlim boshligʼiga buysunadi.

12. Boʼlim boshligʼi institutning buysunuvidagi vazirlik va idoralar bilan kelishilgan holda institut rektorining buyrugʼiga muvofiq belgilangan tartibda lavozimga tayinlanadi va lavozimidan ozod etiladi.

13. Boʼlimning bosh mutaxassisi institut rektorining buyrugʼi bilan belgilangan tartibda lavozimga tayinlanadi va lavozimidan ozod etiladi.

V. Boʼlim boshligʼi va bosh mutaxassisining asosiy funktsional vazifalari

14. Boʼlim boshligʼining asosiy funktsional vazifalari quyidagilardan iborat:

boʼlimga umumiy rahbarlik qiladi, boʼlim ishini tashkil etadi, boʼlimga yuklangan vazifalar va funktsiyalarning bajarilishi hamda ijro intizomi boʼyicha toʼliq javob beradi;

institutda korruptsiyaga qarshi kurashishga oid qonunlar, qonunosti hujjatlariga rioya etilishi ustidan nazorat olib boradi;

korruptsiyaga oid huquqbuzarliklarning oldini olishga qaratilgan chora-tadbirlar va ish rejalarini ishlab chiqadi, ularning toʼliq, sifatli va oʼz vaqtida ijro etilishini taʼminlaydi;

oliy taʼlim muassasasida “Korruptsiyasiz soha” loyihasini amalga oshirishga qaratilgan ishlarni tashkil etadi;

ilgʼor xorijiy tajribalarni oʼrganish asosida korruptsiyaga qarshi kurashish boʼyicha tahliliy materiallar tayyorlaydi;

fuqarolik jamiyati institutlari, huquqni muhofaza qiluvchi va nazorat qiluvchi organlar, ota-onalar bilan korruptsiyaga qarshi kurashish sohasida samarali hamkorlikni yoʼlga qoʼyadi;

komplaens nazorat va korruptsiyaga qarshi kurashishga masʼul shaxslarni oʼqitish va malakasini oshirishni tashkil etadi;

institutda korruptsiyaga yoʼl koʼymaslik yuzasidan amalga oshirilgan ishlar monitoringini yuritadi, tahliliy materiallarni rahbariyatga kiritadi;

boʼlim faoliyatiga taalluqli masalalar boʼyicha hujjatlarni ishlab chiqadi, shuningdek, kiritilgan hujjatlar loyihalari koʼrib chiqilishini taʼminlaydi va takliflar tayyorlaydi;

institut Kengashi tarkibiga kiritiladi hamda majlislarda ishtirok etadi;

boʼlim ishlarini yanada takomillashtirishga oid chora-tadbirlarni ishlab chiqadi va amalga oshirilishini taʼminlaydi;

boʼlim faoliyati bilan bogʼliq jismoniy va yuridik shaxslarning murojaatlarini koʼrib chiqadi hamda ijro intizomiga toʼliq amal qiladi;

qonun hujjatlariga muvofiq vakolati doirasida boshqa funktsional vazifalarni amalga oshiradi.

15. Bosh mutaxassisning asosiy funktsional vazifalari quyidagilardan iborat:

institut pedagog xodimlari, talaba-yoshlar hamda jismoniy va yuridik shaxslar bilan uchrashuvlar tashkil etib, ularni kiynayotgan tizimli muammolarni oʼrganadi, institutda korruptsiyaga oid havf-xatarlar yuqori boʼlgan yoʼnalishlar hamda korruptsiyaga oid huquqbuzarliklar sodir etilishining sabab va shart-sharoitlarini aniqlaydi;

korruptsiyaga qarshi kurashish borasida oʼtkaziladigan oʼrganishlar, tekshirishlar, tahlillar hamda ishlab chiqiladigan takliflarda mutaxassislarni jalb etishda ishtirok etadi;

korruptsiyaga qarshi oʼquv-uslubiy va metodik jihatdan, jumladan audio-video roliklar, foto hamda buklet va broshyura kabi materiallarni yaratishni yoʼlga qoʼyadi;

institutda korruptsiyaning holati, tendentsiyalari va sabablari hamda korruptsiyaga qarshi choralar koʼrishning samaradorligi yuzasidan sotsiologik, ilmiy va boshqa soʼrovlarni tashkil etadi;

boʼlim boshligʼi boʼlmaganda, bosh mutaxassis faoliyatni muvofiqlashtirib boradi;

qonunchilik hujjatlariga muvofiq vakolati doirasida boshqa funktsional vazifalarni amalga oshiradi.

VI. Boʼlim faoliyatini tashkil etish

16. Boʼlim oʼz faoliyatida sohaga doir qonun hujjatlari, tegishli vazirlik va idoralar buyruqlari, Xayʼat qarorlari, institut Kengashi qarorlari, buyruqlari, mazkur Nizom va Boʼlimning ish rejasi asosida amalga oshiradi.

17. Institutning Kengash qarorlari, rektor buyruqlari va tender hujjatlari boʼlim bilan majburiy tartibda kelishiladi.

18. Boʼlimning ish rejasi institut ish rejasi tarkibiy qismi hisoblanadi hamda institut rektori tomonidan tasdiqlanadi.

VII. Yakuniy qoida

19. Boʼlim faoliyatini qayta tashkil etish va tugatish qonun hujjatlarida belgilangan tartibda amalga oshiriladi.