Samarqand iqtisodiyoti va servisi instituti Xotin-qizlar masalalari bo‘yicha maslaxat kengashi

OLIY TA’LIM MUASSASASIDA XOTIN-QIZLARNI QO‘LLAB-QUVVATLASH BO‘YICHA ASOSIY FAOLIYAT YO‘NALISHLARI

Mustaqillikning ilk yillaridan boshlab, respublikamizda xotin-qizlarning rolini va maqomini mustahkamlashga qaratilgan keng ko‘lamli tashabbuslarning asosiy mezoni ularning jamiyatdagi o‘rniga keng e’tibor qaratish va imkoniyatlarini kengaytirish bo‘ldi. So‘nggi yillarda mamlakatimizda xotin-qizlarning jamiyat, iqtisodiyot va boshqaruv sohalarida faol ishtirok etishini ta’minlaydigan keng qamrovli normativ-huquqiy hujjatlar qabul qilindi. Ularning ijtimoiy mavqeini mustahkamlash davlat siyosatining ustuvor yo‘nalishlaridan biriga aylandi. Bugungi kunda iqtisodiyotning barcha sohalari, boshqaruv tizimi va ishlab chiqarish faoliyatida 35,44 % ayollar mehnat qilmoqda, bu ularning jamiyat rivojiga faol ishtirok etayotganligidan dalolat beradi.

Kengashning asosiy maqsadlari quyidagilardan iborat:

· xotin-qizlarning huquqlari va qonuniy manfaatlarini himoya qilishga qaratilgan davlat siyosatini samarali amalga oshirish, shuningdek, ularning jamiyat va davlat hayotidagi rolini va faoliyatini oshirishga qaratilgan tadbirlar kompleksini tashkil etish;

· xotin-qizlarning davlat va jamoat boshqaruvi organlaridagi ishtirokini kengaytirish, ularning kasbiy rivojlanishi va rahbarlik salohiyatini oshirish uchun sharoit yaratish;

· xotin-qizlar duch kelayotgan muammolarni o‘z vaqtida aniqlash, yordamga muhtoj xotin-qizlarning, jumladan imkoniyati cheklangan ayollarning manzilli ro‘yxatlarini shakllantirish bo‘yicha doimiy ish olib borish, shuningdek, ularga zarur yordam ko‘rsatish;

· yoshlar orasida oilaviy va ijtimoiy nizolarni konstruktiv tarzda hal etish bo‘yicha huquqiy va psixologik ko‘nikmalarni shakllantirishga qaratilgan tadbirlarni tashkil etish, oilani mustahkamlash, erta nikohlarning oldini olish va oilaviy ajrimlar darajasini pasaytirish bo‘yicha takliflar ishlab chiqish. Shuningdek, turli o‘quv va targ‘ibot dasturlarini amalga oshirish.

· ayollar va erkaklarning teng huquq va imkoniyatlarini kafolatlovchi normativ-huquqiy hujjatlarning bajarilishini ijtimoiy nazorat qilish, shuningdek, ularning oliy ta’lim muassasasining tuzilmaviy bo‘linmalarida bajarilishini monitoring qilish;

· xotin-qizlarni zo‘ravonlikdan himoya qilish bo‘yicha qonunchilikning bajarilishini nazorat qilish, jabrlanganlarni aniqlash, ularni qo‘llab-quvvatlash va zarur yordam ko‘rsatish bo‘yicha tegishli organlar va jamoat tashkilotlari bilan hamkorlikda ishlarni tashkil etish;

· xotin-qizlarga nisbatan har qanday bosim va zo‘ravonlikning oldini olishga qaratilgan hududiy dasturlarni ishlab chiqish va amalga oshirishda ishtirok etish, shuningdek, ularning xavfsiz yashash sharoitlarini yaratish;

· talabalarni oilaviy hayotga tayyorlashga qaratilgan tadbirlarni amalga oshirish, yosh oilalarni jamoat faoliyatiga jalb qilish, jamiyat uchun foydali ishlar bilan shug‘ullangan, faol ayollarni targ‘ib qilish va ularni namuna sifatida ko‘rsatish;

· belgilangan tartibda universitet rivojiga sezilarli hissa qo‘shgan, yuqori kasbiy faoliyat ko‘rsatgan xodim ayollarni davlat va idoraviy mukofotlarga tavsiya qilish.

Kengashning asosiy vazifalari

Xotin-qizlarning siyosiy, ijtimoiy va iqtisodiy masalalarni hal qilishdagi faoliyatini oshirish, ularning tashabbuslarini har tomonlama qo‘llab-quvvatlash, ijtimoiy-iqtisodiy sharoitlarini yaxshilash, huquq va qonuniy manfaatlarini himoya qilish, shuningdek, milliy-ruhiy qadriyatlarga asoslangan oilaviy munosabatlarni mustahkamlash kengashning asosiy faoliyat yo‘nalishlaridan hisoblanadi. Ushbu sa’y-harakatlar maqsadi — axloqan yetuk, g‘oyaviy mustahkam yoshlarni tarbiyalash, ular orqali millat va davlat rivojiga sezilarli hissa qo‘shish hamda sog‘lom turmush tarzini shakllantirishdir.

Xotin-qizlar masalalari bo‘yicha maslahat kengashi institutning ijtimoiy hayotida faol ishtirok etadi va rahbariyatning qo‘llab-quvvatlashi bilan professor-o‘qituvchilar tarkibi, texnik xodimlar va talabalar o‘rtasida ma’naviy-ma’rifiy ishlarni amalga oshiradi.

Talabalar ruhiy-psixologik holatini o‘rganish maqsadida, qizlar orasida yuksak ma’naviy sifatlarni shakllantirish masalalariga bag‘ishlangan uchrashuvlar va davra suhbatlari muntazam o‘tkaziladi. Ayollar masalalari bo‘yicha maslahat kengashining faoliyati talabalar orasida sog‘lom turmush tarzini shakllantirish, o‘z salomatligiga mas’uliyatli munosabatni rivojlantirish, zararli odatlardan voz kechish, erta jinsiy munosabatlarga kirishmaslik, sport bilan muntazam shug‘ullanish, odob-axloq qoidalariga rioya qilish, ovqatlanish, kiyinish va muloqot madaniyatini shakllantirish, shuningdek, qizlarni oilaviy hayotga tayyorlashga qaratilgan. Talabalar turar joylarida qizlarning xulqi, o‘qishga va kelajakka bo‘lgan munosabati bilan bog‘liq masalalarga bag‘ishlangan turli tadbirlar va davra suhbatlari muntazam tashkil etiladi.

SAMARQAND IQTISODIYOT VA SERVIS INSTITUTI XOTIN-QIZLAR KENGASHI TUZILMASI

Institutdagi Xotin-qizlar Kengashi xotin-qizlarni qo‘llab-quvvatlash, ularning o‘quv, ilmiy, ijtimoiy va jamiyat-siyosiy hayotdagi faoliyatini oshirish bo‘yicha ishlarni muvofiqlashtirish uchun shakllantiriladi. Kengash tarkibiga rais, fakultet dekani maslahatchilari va tegishli bo‘lim rahbarlari kiradi.