E’LON! PROFESSOR-O‘QITUVCHILAR DIQQATIGA!

Turkiya Respublikasi oliy ta'lim muassasalarida stajirovka o'tash va malaka oshirish bo'yicha ochiq tanlov e'lon qilinadi!

O'zbekiston va Turkiya o'rtasidagi oliy ta'lim sohasidagi hamkorlikni rivojlantirish, professor-o'qituvchilarning kasbiy va ilmiy salohiyatini oshirish, ilg'or xorijiy tajribani o'rganish hamda akademik aloqalarni mustahkamlash maqsadida Samarqand iqtisodiyot va servis instituti professor-o'qituvchilari uchun Turkiya Respublikasi oliy ta'lim muassasalarida stajirovka o'tash va malaka oshirish bo'yicha ochiq tanlov tashkil etilishi rejalashtirilmoqda.

Tanlov doirasida ishtirokchilarning kasbiy kompetensiyalarini rivojlantirish, zamonaviy ta'lim metodikalarini o'rganish, ilmiy-tadqiqot faoliyatini takomillashtirish hamda o'zlashtirilgan ilg'or tajribalarni institutning ta'lim va ilmiy faoliyatiga tatbiq etishga alohida e'tibor qaratiladi.

Tanlovda ishtirok etish shartlari

Tanlovda quyidagi talablarga javob beradigan professor-o'qituvchilar ishtirok etishlari mumkin:

• Samarqand iqtisodiyot va servis institutida asosiy shtatda professor-o'qituvchi sifatida faoliyat yuritish;
• Kamida 2 yillik ilmiy-pedagogik ish stajiga ega bo'lish;
• Turk yoki ingliz tilini malaka oshirish dasturida ishtirok etish uchun yetarli darajada, kamida B2 darajasida bilish;
• So'nggi 3 yil davomida ilmiy-pedagogik faoliyatda muayyan natijalarga erishgan bo'lish (ilmiy maqolalar, o'quv-uslubiy ishlanmalar, xalqaro loyihalarda ishtirok va boshqa natijalar);
• Malaka oshirishning maqsadi, dolzarbligi va kutilayotgan natijalarini asoslab bera olish;
• Malaka oshirish davomida o'zlashtirilgan bilim va tajribalarni institutning ta'lim hamda ilmiy faoliyatiga tatbiq etish bo'yicha aniq takliflarga ega bo'lish.

Tanlov uchun talab etiladigan hujjatlar

1. Institut rektori nomiga ariza;
2. Ma'lumotnoma (CV);
3. Ilmiy-pedagogik faoliyat natijalari to'g'risida qisqacha ma'lumot;
4. Til bilish darajasini tasdiqlovchi sertifikat (mavjud bo'lsa);
5. Malaka oshirish maqsadi va kutilayotgan natijalari bayon etilgan motivatsion xat (1-2 bet);
6. Xorijga chiqish pasporti nusxasi.

Hujjatlarni qabul qilish muddati: 2026-yil 25-may.

Hujjatlarni topshirish joyi: Samarqand iqtisodiyot va servis instituti Xalqaro hamkorlik bo'limi.

Tanlovda ishtirok etish istagida bo'lgan professor-o'qituvchilar tanlov shartlari, hujjatlarni topshirish tartibi va muddatlari bo'yicha qo'shimcha ma'lumot olish uchun institut Xalqaro hamkorlik bo'limiga murojaat qilishlari mumkin.

Xalqaro tajriba - yangi bilimlar, ilmiy rivojlanish va sifatli ta'lim sari muhim qadam!

Samarqand iqtisodiyot va servis instituti

#SamISI #XalqaroHamkorlik #Turkiya #Stajirovka #MalakaOshirish