Mamayunus Pardayev hikmatlaridan

Do‘stim deb yurganing aslo dushman bo‘lmasin

Sadoqatsiz do‘st lavozimga erishganda seni unutadi, xuddi shunday sen lavozimdan ketganingda ham unutilasan.

* * *

Soxta odamlarning do‘stligi samimiy bo‘lmaydi.

* * *

Yoningda yurgan kishi xoin bo‘lsa, hech mahal yaxshilik kutma.

* * *

Manfaat uchun do‘st bo‘lgan odamda ham sadoqat bo‘lmaydi. Agar ularga mehr qo‘ygan bo‘lsang ham lavozimdan bo‘shaganingdan keyin topa olmaysan.

* * *

Senga g‘araz qiladiganlar kamchiligingni axtarib yuradi. Ular sen haqingda kimlargadir biror narsa desa, gaplariga befarq bo‘lma. O‘zingni to‘g‘rilab ol.

* * *

Do‘stlik aksariyat holda tili bilan emas, dili va harakati bilan izhor qilinadi.

* * *

Do‘st ham senga munosabatda adashishi mumkin. Birdaniga xulosa chiqarib, voz kechib ketma.

* * *

O‘zini nazorat qilmagan odam, o‘zining eng katta dushmani.

* * *

Do‘stingning tushkunlik kunlari albatta yonida turish kerak.

* * *

Odam do‘stni tanlashda gapiga qarab emas, harakatiga va odatiga qaragani ma’qulroq. Agar unda hasad bo‘lsa, do‘stlashmagan afzal.

* * *

Ustoz jamoani gapi bilan, yaqinlarini ibrati bilan ham tarbiyalaydi.

* * *

Do‘stlik eskirmaydi, sayqallanadi. Yoshlikdagi do‘stlik aksariyat holda samimiyligicha qoladi.

* * *

 “Do‘stim deb yurganing aslo dushman bo‘lmasin”, degan holatga tashxis qo‘yish uchun sinab ko‘ring.

* * *

Do‘stlikni bog‘lab turadigan eng kuchli ip – bu sadoqatdir.

* * *

Odatlar bir-biriga o‘xshamasa do‘st bo‘lish qiyin. Yolg‘onchi bilan yolg‘onchilar o‘rtasidagi do‘stlik “samimiy” bo‘ladi. 

* * *

Rostgo‘y kishi yolg‘onchi bilan do‘st bo‘la olmaydi.

* * *

Aksariyat holda shogirdning kamoloti ustozning mahoratiga bog‘liq.

* * *

Iqrorlikning zamirida ishonch yotadi. Do‘stlikni bog‘lab turuvchi omillardan biri ham ishonchdir.

* * *

Do‘stlikda faqat quvonch va muvoffaqiyatlar emas, balki iztirob va tashvishlar ham bo‘ladi. Haqiqiy do‘stlar bunga chidaydilar.

* * *

Keksaygan chog‘ida ham samimiy do‘sti bor odam juda baxtlidir.

* * *

Osmonga bulut chiqsa hamisha ham yomg‘ir yog‘avermaydi.

* * *

Tunni yoritish uchun oyning nuri, ko‘ngilni yoritish uchun esa mehr nuri lozim ekan.

* * *

Muhabbat va do‘stlik egizak. Ikkalasi ham ikki tomonlama sadoqatni talab qiladi.

* * *

Insonlar kamchiliksiz bo‘lmaydi. Buni faqat Alloh va samimiy do‘stlargina kechiradi.

* * *

O‘tmishingiz go‘zal, buguningiz go‘zal, kelajagingiz ham go‘zal bo‘lishi uchun qanoatli, halol va sabrli bo‘lib qolishda davom eting.

* * *

Hurmmatli ayollar eringizni yaxshi ko‘rish uchun o‘zlaringizni ham yaxshi ko‘rsating.

* * *

Vaqt foydalansangiz benazir do‘st, shunchaki o‘tkazib yuborsangiz katta dushman. Chunki u bir kunlik umringizni olib ketdi.

* * *

Bir maqsadga erishish uchun do‘stlashsangiz, bu aksariyat holda vaqtincha.

* * *

Mamayunus Pardayev hikmatlaridan